Korçë, arrestohet edukatorja për dhunë ndaj një 4-vjeçari në kopsht
KORÇË – Një edukatore është arrestuar nga Policia e Korçës, pasi dyshohet se ka ushtruar dhunë fizike ndaj një fëmije 4-vjeçar në kopsht.
Ngjarja është denoncuar nga nëna e të miturit, e cila ka vënë re se djali prej disa ditësh shfaqte shqetësime. Sipas informacioneve paraprake, fëmija i ka treguar nënës se ishte goditur nga edukatorja.
Pas kallëzimit, policia ka nisur hetimet dhe ka këqyrur edhe pamjet e kamerave të sigurisë së kopshtit.
Edukatorja është arrestuar nën dyshimin për veprën penale “Keqtrajtimi i të miturve”, ndërsa materialet i janë referuar Prokurorisë së Korçës për hetime të mëtejshme.