Fieri mobilizohet për të ndihmuar familjen Meta në Sheqishte pas arrestimit të kryefamiljarit Zamir Meta për abuzim seksual me të bijën 12 vjeçe.
Teksa e mitura që akuzoi babanë për abuzim seksual, ndodhet në një qëndër sociale, motra dhe vëllezërit e saj bashkë me të ëmën, po përballen me varfërinë. Juela Meta është parë nga gazetarët në rrugët e Fierit teksa kërkonte ndihmë për të ushqyer gjashtë fëmijet. Në kushtet kur ndihmat e bashkisë kërkojnë zbatimin e proçedurave ligjore, Shoqata e Gazetarëve Profesionistë në Fier organizoi me kontribut vullnetar dërgimin e pakove ushqimore në banesën e familjes Meta në Sheqishte.
Nismës iu bashkuan edhe biznese në sektorin e tregtisë ushqimore. Gjyshi i të miturës, tha se mbesa tani është në qëndër sociale por ndihmë urgjente kërkohet edhe për fëmijët e tjerë dhe të ëmën e tyre. Ruko, kërkoi ndihmë dhe zgjidhje afatgjatë për të bijën, nipërit dhe mbesat duke falënderuar gazetarët për nismën dhe kontributin e dhënë
” I falënderoj gazetarët që ndihmuan këta fëmijë jetimë, se tani janë pa baba. Ajo që ka bërë ai me mbesën është fatkeqësi, unë nul e dija që gjendja të ishte kaq e rëndë. Do kisha marrë masa nëse do ta dija”, tha ai.
Ndërkohë bashkia e Fierit pritet të vendosë në dispozicion një shumë prej 200.000 lekësh si dhe bonus qeraje për strehim. Keto janë proçedura standarte për familjet në nevojë, por fëmijët e familjes meta dhe e ëma kanë nevojë urgjente për ndihmë. Ndaj proçedura për ketë rast pritet të jetë e përshpejtuar për tw sistemuar familjen në një banesë me kushte të përshtatshme. Edhe administrata e bashkisë së Fierit do të organizojë një fond vullnetar për dërgimin e ndihmave ushqimore familjes në Sheqishte. Organizatat civile, bizneset dhe komunitetet fetare, pritet të grumbullojnë ndihma gjithashtu.
Kryefamiljari Zamir Meta është në burg që prej të dielës se kaluar i akuzuar nga e bija 12 vjeçe për abuzim seksual. Ai vetë ka pranuar se e ka kryer aktin monstruoz. E mitura po trajtohet në një qëndër sociale shtetërore.